Xalqaro Olimpiya qo‘mitasi (XOQ) prezidenti Tomas Bax XOQning Ijroiya kengashi boksni 2028 yilgi Olimpiya o‘yinlari dasturiga kiritishni tavsiya qilganini aytdi.
“Bugun Ijroiya kengashi ancha xotirjam edi. Faqat bitta ishonarli qaror qabul qilindi. Fevral oyida World Boxing vaqtinchalik tan olingan edi. Buning ortidan boksni 2028 yilgi Los-Anjeles Olimpiadasiga kiritish haqida gap bordi.
Biz qabul qilgan qaror tufayli ham sessiyada bu tavsiya ko‘tarildi. Ishonchim komilki, sessiyada bu masala ijobiy qabul qilinadi. Shunday ekan, jahondagi barcha boks milliy federasiyalari World Boxing tomonidan tan olinsa, 2028 yilgi Olimpiadada bu sport turini ko‘rishimiz mumkin bo‘ladi”, dedi Bax.
Eslatib o‘tamiz, turli bahs-munozaralar ortidan boks sport turining Olimpiya o‘yinlaridan chiqarib tashlanishi haqida mish-mishlar tarqalgan edi. Bunga rossiyalik Umar Kremlyov boshchiligidagi IBA tomonidan «Gazprom» bilan yangi homiylik shartnomasi imzolanishi sabab bo‘lgan. Qayd qilish joizki, XOQ va IBA o‘rtasidagi uzoq yillik ziddiyatga qaramay, boksni Olimpiya maqomidan mahrum qilish bo‘yicha real tahdidlar ilgari hech qachon bo‘lmagan.
