Халқаро Олимпия қўмитаси (ХОҚ) президенти Томас Бах ХОҚнинг Ижроия кенгаши боксни 2028 йилги Олимпия ўйинлари дастурига киритишни тавсия қилганини айтди.
“Бугун Ижроия кенгаши анча хотиржам эди. Фақат битта ишонарли қарор қабул қилинди. Февраль ойида World Boxing вақтинчалик тан олинган эди. Бунинг ортидан боксни 2028 йилги Лос-Анжелес Олимпиадасига киритиш ҳақида гап борди.
Биз қабул қилган қарор туфайли ҳам сессияда бу тавсия кўтарилди. Ишончим комилки, сессияда бу масала ижобий қабул қилинади. Шундай экан, жаҳондаги барча бокс миллий федерациялари World Boxing томонидан тан олинса, 2028 йилги Олимпиадада бу спорт турини кўришимиз мумкин бўлади”, деди Бах.
Эслатиб ўтамиз, турли баҳс-мунозаралар ортидан бокс спорт турининг Олимпия ўйинларидан чиқариб ташланиши ҳақида миш-мишлар тарқалган эди. Бунга россиялик Умар Кремлёв бошчилигидаги IBA томонидан «Газпром» билан янги ҳомийлик шартномаси имзоланиши сабаб бўлган. Қайд қилиш жоизки, ХОҚ ва IBA ўртасидаги узоқ йиллик зиддиятга қарамай, боксни Олимпия мақомидан маҳрум қилиш бўйича реал таҳдидлар илгари ҳеч қачон бўлмаган.
