Kataloniyaning «Barselona» klubi o‘z tarbiyalanuvchisi, vinger Ansu Fatini sotishni rejalashtirmoqda. Bu haqda mashhur jurnalist va insayder Fabrisio Romano X ijtimoiy tarmog‘ida xabar berdi.

Manbaga ko‘ra, yanvar oyida Fati to‘rttadan ortiq taklifni rad etgan, ammo qaror qabul qilishda so‘nggi so‘z unga tegishli bo‘ladi. Shu bilan birga, klub uning ketishi borasidagi takliflarni ko‘rib chiqishga tayyor. Faqat muvaffaqiyatli transfer amalga oshsa, jamoaga yangi vinger kelishi mumkin.

Avvalroq xabar qilinganidek, Fati klubning na murabbiylar shtabi, na rahbariyati rejalariga kirmaydi. U 4 yanvardan beri rasmiy uchrashuvlarda ishtirok etmagan – o‘shanda u Ispaniya Kubogining 1/16 finalida «Barbastro»ga (4:0) qarshi o‘yinda 28 daqiqa maydonga tushgan. Shundan keyin u yoki zaxirada qolgan yoki qaydnomaga kiritilmagan. La Ligada Fati oxirgi marta 2024 yil noyabr oyida, Chempionlar Ligasida esa oktyabrda maydonga tushgan.

Eslatib o‘tamiz, ispaniyalik hujumchisi 2020 yil sentyabr oyidan beri «Barselona» safida o‘ynamoqda. Joriy mavsumda u atigi 8 ta uchrashuvda (200 minutdan kam) ishtirok etgan, biroq na gol urgan, na assist qilgan. Transfermarkt ma’lumotlariga ko‘ra, uning bozor qiymati 10 million yevroni tashkil etadi.