«Andijon»ning “Bobur arena”da «Nasaf»ga qarshi o‘yini barchada iliq taassurot qoldirgani rost. Stadiondagi muhit juda boshqacha ruhda bo‘ldi va bunday atmosferada to‘p surish har qanday futbolchi uchun yoqimli.

Bu yil jamoaga qo‘shilgan va sardor sifatida to‘p surayotgan tajribali Oleg Zoteev «Nasaf» bilan uchrashuvda ajoyib gol muallifiga aylandi va bu uning «Andijon» tarkibidagi ilk goli bo‘ldi. Qolaversa, Zoteev 2025 yilda “Bobur arena”da birinchi golni urgan o‘yinchi sifatida ham yodda qoladigan bo‘ldi.

33-raqam ostidagi Olegdan barchaning, shu jumladan muxlislarning ham umidi katta. Chunki bu yilgi mavsum «Andijon» uchun juda muhim sanaladi. Har bir uchrashuv esa o‘zgacha ahamiyat kasb etadi. Keyingi turda «Andijon» Namanganda «Navbahor»ga qarshi maydonga tushadi. Tabiiyki, bo‘lajak bellashuvga ham qiziqish qandayligini ortiqcha ta’riflash shart emas.

«Andijon» yetakchisi va sardori Zoteev «Nasaf»ga qarshi o‘yin, ilk goli va «Navbahor» bilan bo‘ladigan bo‘lajak bellashuv borasida «Andijon» matbuot xizmatiga fikrlarini aytib o‘tdi.

“O‘z maydonimizdagi birinchi o‘yindan taassurotlar a’lo darajada. Ochilish o‘yinida katta bayram bo‘ldi. Juda qiyin uchrashuv kechdi. Menimcha, ishqibozlarga yoqadigan yoqimli o‘yin bo‘lib o‘tdi. Bunday qo‘llab-quvvatlov bilan faqat g‘alabaga erishish kerak. Har qanday holatda ham muxlislarimiz biz bilan birga. Ajoyib atmosferada to‘p surish boshqacha.

Albatta, birinchi golimni uraman deb kutmagandim. Har doim yaxshi va sifatli o‘yin ko‘rsatish va jamoamiz g‘alabasiga hissa qo‘shish maqsadini oldimga qo‘yaman.

«Nasaf»ga qarshi yaxshi tayyorgarlik ko‘rgandik. Ishonamanki, o‘yindan-o‘yinga «Andijon» kuchayib boradi va biz qo‘shishimiz kerak. Bu yil jamoamiz o‘z oldiga qo‘ygan maqsadlariga erishish uchun kurashadi. Vaqt hamda sabr kerak. Biz esa oxirigacha harakat qilamiz.

Dastlabki turlarda hamma jamoa deyarli bir xil holatda bo‘ladi. Ko‘proq ishlashimiz kerak. O‘ylaymanki, «Andijon»ga bitta g‘alaba yetishmayapti. Bitta g‘alabaga erishsak, o‘yin ham yanada «ochilib» ketadi.

Hamma muxlislarni Namanganda qiziqarli o‘yin kutyapti. Vodiy derbisiga qiziqish katta. Oddiy o‘yinlar qolmagan. Raqibni yaxshi o‘rganib, tahlil qilamiz va jiddiy tayyorgarlik ko‘ramiz. Muxlislarimizni xursand qilishga harakat qilamiz”, - deydi Oleg Zoteev.