Ispaniya terma jamoasi bosh murabbiyi Luis de la Fuente Lamin Yamalning Millatlar ligasi chorak finalidan o‘rin olgan Niderlandiyaga qarshi o‘yindagi ishtiroki haqidagi savolga javob qaytardi.

Ispanlar ikki o‘yin natijasiga ko‘ra 5:5 hisobidagi durangdan so‘ng penaltilar seriyasida g‘alaba qozonib, yarim finalga yo‘l oldi. "Barselona"ning 17 yoshli vingeri "qizil furiya"ning penaltini golga aylantira olmagan yagona futbolchisiga aylandi, biroq biroz oldinroq aynan u qo‘shimcha bo‘limlarda muhim golni urgandi.

"Lamin penalti tufayli biroz xafa bo‘lishi mumkin, lekin u ham hammamiz kabi baxtli. Menimcha, u juda yaxshi harakat qildi, kerakli hamma narsani qildi, ajoyib gol urdi. U o‘sishda davom etmoqda, har doim jamoaning muvaffaqiyatiga asosiy hissa qo‘shmoqda va men u uchun juda xursandman," - dedi de la Fuente matbuot anjumanida.