Испания терма жамоаси бош мураббийи Луис де ла Фуэнте Ламин Ямалнинг Миллатлар лигаси чорак финалидан ўрин олган Нидерландияга қарши ўйиндаги иштироки ҳақидаги саволга жавоб қайтарди.
Испанлар икки ўйин натижасига кўра 5:5 ҳисобидаги дурангдан сўнг пенальтилар сериясида ғалаба қозониб, ярим финалга йўл олди. "Барселона"нинг 17 ёшли вингери "қизил фурия"нинг пенальтини голга айлантира олмаган ягона футболчисига айланди, бироқ бироз олдинроқ айнан у қўшимча бўлимларда муҳим голни урганди.
"Ламин пенальти туфайли бироз хафа бўлиши мумкин, лекин у ҳам ҳаммамиз каби бахтли. Менимча, у жуда яхши ҳаракат қилди, керакли ҳамма нарсани қилди, ажойиб гол урди. У ўсишда давом этмоқда, ҳар доим жамоанинг муваффақиятига асосий ҳисса қўшмоқда ва мен у учун жуда хурсандман," - деди де ла Фуэнте матбуот анжуманида.
