2017 yil tashkil topgan klub 2019 yilga kelib Liga a’zosiga aylangan hamda ilk urinishdayoq B Proliga musobaqasining Sharqiy mintaqasida g‘olib chiqib, Proliga yo‘llanmasini qo‘lga kiritgandi.

Klub mos ravishda 2020 va 2022 yillarda Proligada muvaffaqiyatli ishtirok etdi va ikki bor Superliga yo‘llanmasiga ega chiqib, 2021 va 2023 yillarda elitada ishtirok etdi. Asosiy musobaqada «Turon» muvaffaqiyatli to‘p tepa olmagan bo‘lsada, ko‘plab muxlis va mutaxassislar e’tirofiga sazovor bo‘ldi.

«Turon» xususiy klub sifatida Liga tomonidan qo‘yilgan qator talablarni bajarishga erishdi. Yaypandagi O‘zbekiston stadioni qayta ta’mirdan chiqarildi, uning sharqiy qismiga yangi tribuna qurildi va ilk bor stadion yoritish tizimiga ega bo‘ldi. Liga mazkur arenada 2022 yilgi mamlakat Superkubogini o‘tkazishga ham erishdi. O‘zbekiston stadionidan uzoq tarixga ega bo‘lgan "Qo‘qon-1912" va "Neftchi" futbol klublari ham bir qator uchrashuvlarda foydalandi.

Klub, shuningdek, bolalar futboliga ham e’tibor qaratib, o‘z akademiyasini foydalanishga topshirgandi. Zamonaviy baza va unga tutash hududda mashg‘ulot maydonlari ham bunyod etildi. Qayd etish kerak, Superliganing bir necha yillik ayrim klublarida ham bunday sharoitlar mavjud emas.

Xususiy klub va uning investorlariga berilgan imtiyozlar muddati o‘z yakuniga yetgach, «Turon» klubida moliyaviy qiyinchiliklar boshlandi. U 2024 yilni Birinchi ligada 17-18 yoshli futbolchilar bilan o‘tkazib, yakunda Sharq mintaqasida 11-o‘rinni egallagandi. Shu yilning 19 mart kuni esa «Turon» Liga qatnashchilari safidan chiqishini rasman ma’lum qildi.

Liga «Turon» futbol klubi tashkilotchi va tashabbuskorlariga o‘tgan 6 yillik hamkorlik uchun minnatdorchilik bildiradi.