Namangandagi "Markaziy" stadioniga tutash hududda joylashgan zaxira futbol maydoni so‘nggi uch mavsum davomida o‘z sifatini yo‘qotib bordi. "Navbahor" klubi Liganing qator ogohlantirishlariga qaramay, mazkur masala ustida yetarlicha ish olib bormadi va oqibatda klubning U21 jamoasi mavsumning ilk rasmiy o‘yinida texnik mag‘lubiyat qabul qilib oldi.
Shundan so‘ng futbol maydonini tartibga keltirish yuzasidan ish boshlandi. 24 mart kuni Liga mutaxassislari Namanganda bo‘lib, o‘zgarishlar bilan tanishdi. Maydon hududi cheklangan bo‘lib, zaxira o‘rindig‘i, yordamchi hakam va nazoratchi uchun mo‘ljallangan nuqtalar futbolchilar erkin harakatlanishi uchun xalal berib kelgan. Endilikda mazkur nuqtalar tribunaga ko‘chirildi.
Shuningdek, jamoalar va hakamlar kiyim almashtirish xonalarida va nihoyat ta’mirlash ishlari boshlangan bo‘lib, klub rahbariyati uni 27 mart kuni nihoyasiga yetkazishni rejalashtirgan. Biroq futbol maydonida kamchiliklar yetarlicha. Maysa oylab parvarish qilinmasligi oqibatida, uning holati yomonlashib borgan. "Navbahor U21" jamoasiga texnik mag‘lubiyat yozilganidan keyingina, zaxira maydonida qandaydir harakatlar boshlangan.
Maydon ajriq bilan qoplangani uchun, u aprel oyining birinchi o‘n kunligida o‘z holatini yaxshilashi tahmin qilinmoqda. Buning uchun klub va stadion rahbariyati maydon parvarishiga urg‘u berishda davom etishi, maysa o‘z vaqtida sug‘orilishi va kerakli ozuqalar bilan ta’minlanishi shart.
Yuqoridagi harakatlar inobatga olinib, Liga mutaxassislari 12 aprel kuni bo‘lib o‘tadigan "Navbahor U21" — "Sho‘rtan U21" o‘yinidan keyin futbol maydonini qayta monitoring qiladi. Unga qadar "Navbahor U21" jamoasi mazkur maydonda 2 ta uchrashuv o‘tkazishi uchun istisno tariqasida ruxsat beriladi. Klub rahbariyati 13 aprel holatiga ko‘ra Ligaga berilgan va’dani to‘liq bajarsa va avvalgi yillarda bo‘lgani kabi e’tiborsizlik qilmasa, Liga keyingi tur uchrashuvlar uchun ham maydonni ro‘yxatdan o‘tkazadi.
Liga nafaqat zaxira maydoni, balki asosiy tarkib o‘z uchrashuvlarini o‘tkazadigan asosiy maydon holatini yaxshilash bo‘yicha ham ish olib borilishiga umid qiladi. 2018 yil foydalanishga topshirilgan futbol maydoni o‘z vaqtida respublikadagi eng yaxshilaridan biri edi. Oradan 7 yil o‘tib, turli faktorlar sabab maydon holatida salbiy o‘zgarishlar yuz bergan. 2026 yilga qadar holatni o‘nglash uchun yetarlicha vaqt mavjud.
