Superliganing 3-turidan o‘rin olgan "Bunyodkor" – "Surxon" (3:1) uchrashuvidan keyin "qaldirg‘ochlar" ustozi Ilyos Zeytullayev o‘z fikrlari bilan o‘rtoqlashdi.
- O‘ylashimcha qiziqarli uchrashuv o‘tkazdik. Ilk daqiqalardanoq hujumkor, agressiv o‘yin ko‘rsatdik. Raqib darvozasi oldida xavfli vaziyatlarni yuzaga keltira oldik. "Surxon" yaxshi shakllangan jamoa ekanligini bilardik. Futbolchilar shunga mos ravishda himoyada yanada diqqatliroq bo‘lishdi. Chunki mehmonlar tarkibida texnikasi yuqori o‘yinchilar bor. Aytganimdek, umumiy ma’noda qiziqarli bahs bo‘ldi. Agar muxlis bo‘lganimda bu kabi bellashuvlarni yana bir marta ko‘rar edim. Mavsumni omadsiz boshlagan "Surxon"ga navbatdagi uchrashuvlarda omad tilayman!
Qo‘l ostimda juda ahil jamoa yig‘ilgan. Futbolchilar bir-biriga yordam beradi, bir-biri uchun harakat qiladi. Bizda bir tomonni o‘ziga tortadigan insonlar yo‘q. Shunday bo‘lganida bu o‘z so‘zini aytardi. Odil Hamrobekov, Bobur Yo‘ldoshev, Temurxo‘ja Abduxoliqov kabi yigitlar jamoani o‘z ortidan o‘zgashtira oladi. Albatta butun mavsumni shunday barqaror kayfiyatda o‘tkazishni istaymiz, ammo futbolda qiyinchiliklar bo‘ladi. Jamoa kuchli bo‘lsa bu qiyinchiliklarni oson yengib o‘tadi. Xursand qiladigan tomoni shuki, biz qishki yig‘inlarda ham mag‘lubiyatga uchramagan edik, lekin qachondir baribir qiyin kunlar keladi. Shunday kunlarda birgalikda kuchli bo‘lishimiz kerak.
"Surxon"ning kuchli tomonlari shu ediki, agar raqibga ustunlikni topshirib qo‘ysak, butun bellashuv davomida to‘psiz o‘ynashimizga to‘g‘ri kelardi. Qolaversa, raqibning ayrim o‘yinchilariga masofa qoldirsangiz sizga katta muammolar tug‘diradi. Biz buni bilardik va mashg‘ulotlarda shunga mos ravishda tayyorgarlik ko‘rgandik. Yigitlar vazifani to‘liq bajarishdi.
