Суперлиганинг 3-туридан ўрин олган "Бунёдкор" – "Сурхон" (3:1) учрашувидан кейин "қалдирғочлар" устози Илёс Зейтуллаев ўз фикрлари билан ўртоқлашди.

- Ўйлашимча қизиқарли учрашув ўтказдик. Илк дақиқаларданоқ ҳужумкор, агрессив ўйин кўрсатдик. Рақиб дарвозаси олдида хавфли вазиятларни юзага келтира олдик. "Сурхон" яхши шаклланган жамоа эканлигини билардик. Футболчилар шунга мос равишда ҳимояда янада диққатлироқ бўлишди. Чунки меҳмонлар таркибида техникаси юқори ўйинчилар бор. Айтганимдек, умумий маънода қизиқарли баҳс бўлди. Агар мухлис бўлганимда бу каби беллашувларни яна бир марта кўрар эдим. Мавсумни омадсиз бошлаган "Сурхон"га навбатдаги учрашувларда омад тилайман!

Қўл остимда жуда аҳил жамоа йиғилган. Футболчилар бир-бирига ёрдам беради, бир-бири учун ҳаракат қилади. Бизда бир томонни ўзига тортадиган инсонлар йўқ. Шундай бўлганида бу ўз сўзини айтарди. Одил Ҳамробеков, Бобур Йўлдошев, Темурхўжа Абдухолиқов каби йигитлар жамоани ўз ортидан ўзгаштира олади. Албатта бутун мавсумни шундай барқарор кайфиятда ўтказишни истаймиз, аммо футболда қийинчиликлар бўлади. Жамоа кучли бўлса бу қийинчиликларни осон енгиб ўтади. Хурсанд қиладиган томони шуки, биз қишки йиғинларда ҳам мағлубиятга учрамаган эдик, лекин қачондир барибир қийин кунлар келади. Шундай кунларда биргаликда кучли бўлишимиз керак.

"Сурхон"нинг кучли томонлари шу эдики, агар рақибга устунликни топшириб қўйсак, бутун беллашув давомида тўпсиз ўйнашимизга тўғри келарди. Қолаверса, рақибнинг айрим ўйинчиларига масофа қолдирсангиз сизга катта муаммолар туғдиради. Биз буни билардик ва машғулотларда шунга мос равишда тайёргарлик кўргандик. Йигитлар вазифани тўлиқ бажаришди.