«Real» bosh murabbiyi Karlo Anchelotti Ispaniya kubogi yarim final bosqichi doirasida «Real Sosyedad»ga qarshi bo‘lib o‘tgan javob uchrashuviga qarshi o‘yin (4:4) borasida o‘z fikrini bildirib o‘tdi.

«Hisob 0:1 bo‘lganda, jamoa o‘zini juda yaxshi ko‘rsatdi va tezda tenglashtirdi. Xuddi shu holat 1:3 da ham takrorlandi. Qo‘shimcha vaqtda biz, mening fikrimcha, kuchliroq o‘ynadik. Aniq xatolar bor edi, lekin yakunda biz uddaladik. “Real Sosyedad” rostdan ham kuchli jamoa, ular bizga katta qiyinchilik tug‘dirdi. Biz finalga chiqa olishimizga hech qachon shubha qilmagandim. Chunki “Bernabeu”da har narsa sodir bo‘lishi mumkin. O‘z maydonimizda biz hech qachon taslim bo‘lmaymiz, bu esa juda muhim», — Anchelottining so‘zlarini Mundo Deportivo keltiradi.

Eslatib o‘tamiz, ikki uchrashuv natijalariga ko‘ra, hisob 5:4 «Real» foydasiga yakunlandi. Final uchrashuvida «Real» «Atletiko» va «Barselona» o‘rtasidagi to‘qnashuv g‘olibi bilan ro‘baro‘ keladi.