Angliyaning «Liverpul» klubi sobiq tahlil bo‘limi direktori Ian Gremning aytishicha, jamoa bosh murabbiyi Yurgen Klopp 2017 yil yozida «Roma» vingeri Muhammad Salohni sotib olishga qarshi bo‘lgan.  

«Yurgenning o‘sha yozdagi asosiy varianti Yulian Brandt edi. U ajoyib futbolchi edi. Yurgen uni juda yaxshi bilardi, chunki u Bundesligada o‘ynagan va nemis bozorini yaxshi tushunardi. Biz ham Brandt yosh va iqtidorli futbolchi ekanligiga qo‘shildik, ammo u Salohdek ajralib turmasdi. Bizning ma’lumotlar tahliliga ko‘ra, o‘sha paytda Muhammad Yevropadagi eng yaxshi yosh vingerlardan biri edi. «Roma» moliyaviy muammolar tufayli uni sotishga majbur edi, shuning uchun biz uni munosib narxda xarid qilish mumkinligini bilardik.  

U o‘sha vaqtda bizga kerak bo‘lgan qanot hujumchisi rolida o‘ynardi, Brandt esa ko‘proq hujumkor yarimhimoyachi edi. Yurgen haqiqatdan ham ochiq fikrli kishi, u muhokamaga rostgo‘ylik bilan yondashdi va: «Xop, men tasdiqlashga ochiqman, menga ko‘rsating, nima uchun Saloh yaxshiroq ekan?» dedi», — deya yozib qoldirdi Grem BBC telekanalidagi «Chempionlar Ligasini qanday yutish mumkin: Liverpul-2019» nomli hujjatli filmda.

Muhammad Saloh 2017 yil iyul oyida Italiyaning «Roma» klubidan «Liverpul»ga o‘tgan. Uning transferi uchun 42 mln yevro to‘langan. Shu vaqtga qadar misrlik hujumchi «Liverpul» safida 393 ta o‘yin o‘tkazib, 243 ta gol urdi va 110 ta golli uzatma amalga oshirdi.