O‘zbekiston U-17 terma jamoasi bosh murabbiyi Islom Ismoilov tayyorgarlik va o‘tkazilgan o‘yinlar xususida fikr bildirdi.

"Birinchi navbatda yurtimizdagi barcha futbol muxlislarini Jahon chempionatiga chiqqanimiz bilan tabriklayman. Buning tagida katta mehnat yotibdi. Bu nafaqat terma jamoa murabbiylar shtabining yutug‘i hisoblanadi, balki bunda ushbu yoshdagi futbolchilarni tarbiyalashda mehnat qilayotgan O‘zbekistondagi barcha murabbiylarning xizmatlari ham juda katta. Men ularga ham o‘z minnatdorchiligimni bildiraman. Futbolchilarning shu holatga yetib kelishida ularning o‘rni beqiyos.

Biz kuchli bo‘lishimiz kerak, oldinga harakatlanishimiz kerak. O‘tkazilgan 2 ta o‘yinga keladigan bo‘lsak, ular oson raqiblar emasdi. Tailand ham o‘ziga yarasha yaxshi raqib. Xitoy futboli esa so‘nggi yillarda jadallik bilan rivojlanyapti. Bu yoshdagi termani yaponiyalik murabbiy boshqargani uchun jamoa o‘yinida bir qancha chizgilar ko‘zga tashlandi. Ikki bahsga ham jiddiy tayyorgarlik ko‘rdik. Ammo futbolchilarda ruhiy holat bilan bog‘liq biroz muammolar bo‘ldi. Biribir, ular hali yosh. O‘z oldilarida turgan mas’uliyatni juda yaxshi tushunib turishgan edi. Shuning evaziga uchrashuvning ayrim pallarida o‘yinimiz yaxshi qovushmagan bo‘lsa, ba’zi vaziyatlarda yaxshi harakat qildik. O‘ylaymanki, barchasi ortda qoldi. Keyingi bahslarda mashg‘ulotda ishlagan uslubimizni futbolchilar ko‘rsata boshlashadi, deb o‘ylayman", — dedi Ismoilov O‘FA matbuot xizmatiga bergan intervyusida.