Ўзбекистон U-17 терма жамоаси бош мураббийи Ислом Исмоилов тайёргарлик ва ўтказилган ўйинлар хусусида фикр билдирди.

"Биринчи навбатда юртимиздаги барча футбол мухлисларини Жаҳон чемпионатига чиққанимиз билан табриклайман. Бунинг тагида катта меҳнат ётибди. Бу нафақат терма жамоа мураббийлар штабининг ютуғи ҳисобланади, балки бунда ушбу ёшдаги футболчиларни тарбиялашда меҳнат қилаётган Ўзбекистондаги барча мураббийларнинг хизматлари ҳам жуда катта. Мен уларга ҳам ўз миннатдорчилигимни билдираман. Футболчиларнинг шу ҳолатга етиб келишида уларнинг ўрни беқиёс.

Биз кучли бўлишимиз керак, олдинга ҳаракатланишимиз керак. Ўтказилган 2 та ўйинга келадиган бўлсак, улар осон рақиблар эмасди. Таиланд ҳам ўзига яраша яхши рақиб. Хитой футболи эса сўнгги йилларда жадаллик билан ривожланяпти. Бу ёшдаги термани япониялик мураббий бошқаргани учун жамоа ўйинида бир қанча чизгилар кўзга ташланди. Икки баҳсга ҳам жиддий тайёргарлик кўрдик. Аммо футболчиларда руҳий ҳолат билан боғлиқ бироз муаммолар бўлди. Бирибир, улар ҳали ёш. Ўз олдиларида турган масъулиятни жуда яхши тушуниб туришган эди. Шунинг эвазига учрашувнинг айрим палларида ўйинимиз яхши қовушмаган бўлса, баъзи вазиятларда яхши ҳаракат қилдик. Ўйлайманки, барчаси ортда қолди. Кейинги баҳсларда машғулотда ишлаган услубимизни футболчилар кўрсата бошлашади, деб ўйлайман", — деди Исмоилов ЎФА матбуот хизматига берган интервьюсида.