Ispaniya sport sudi “Real Madrid”ning shikoyatidan so‘ng Xavyer Tebas ustidan ish ochdi.

AS xabariga ko‘ra, Madrid klubi Tebasni hakamlikni baholash bo‘yicha klublar o‘rtasida 2023 yil aprel oyida o‘tkazilgan so‘rovnoma maxfiyligini buzganlikda ayblab, Oliy sport kengashiga murojaat qilgan. "Real"ning shikoyatiga 3 fevral kuni yozgan tvit sabab bo‘lgan, unda La Liga prezidenti shunday yozgan: "Biz Madridda hakamlik tizimini o‘zgartirishga qarshi ovoz berdik".

Shikoyat ro‘yxatga olinganidan so‘ng, Oliy sport kengashi Sport tribunaliga mumkin bo‘lgan qoidabuzarlik bo‘yicha tergovni boshlashni buyurdi. Payshanba kuni Tebasga qarshi intizomiy ish ochildi. "Real Madrid" Tebas La Liga nizomining 19-moddasida ko‘rsatilgan shaxsiy hayot huquqini buzgan deb hisoblaydi.

Ma’lum qilinishicha, Ispaniya sport qonunchiligiga ko‘ra, Bosh assambleya qarorlari va qonun yoki reglamentda belgilangan qoidalarga rioya qilmaslik og‘ir jinoyat hisoblanadi.

Tebas ommaviy tanbeh, 2 yildan 15 yilgacha barcha sport lavozimlaridan chetlashtirilishi yoki La Liga prezidenti lavozimidan chetlatilishi, shuningdek, 3000 dan 30 000 yevrogacha jarimaga tortilishi mumkin.