Superliganing 5-turidan o‘rin olgan «Bunyodkor» – «Qizilqum» (0:0) uchrashuvidan so‘ng mezbonlar ustozi Ilyos Zeytullayev o‘z fikrlari bilan o‘rtoqlashdi.

-  Barchaga xayrli kech! O‘yinni ko‘rdinglar, menda yigitlarga minnatdorchilik uchun so‘z yo‘q, chunki ketma-ket ikkinchi uchrashuvni ham 10 kishi bo‘lib yakunlayapmiz. Bugun g‘alaba qozonishni astoydil xohlagandik, sababi o‘z uyimizda, muxlislarimiz ko‘z o‘ngida to‘p surdik. Yigitlar juda yaxshi o‘yin namoyish qilishdi. Barcha imkoniyatimizni ishga solib gol urishni istagandik, ammo ritmni «buzib» turishsa, bu oson emas. Fikrimcha, bugun toza futbol vaqti bir bo‘limdan biroz ko‘proq bo‘ldi. Buni aytish to‘g‘rimi-noto‘g‘rimi bilmadim, raqib bugun o‘zi xohlaganiga erishdi, o‘yin ritmini «buza» oldi. Shu sababli juda ko‘p vaqtni yo‘qotdik. Menimcha bunga e’tibor qaratish kerak. Turkiyadagi yig‘inimizda bizga bu kabi holatlarga chora ko‘rilishini haqida aytishgan edi. O‘ylashimcha, bu sizlar ham muhokama qiladigan mavzu. Umumiy ma’noda esa, bugun jamoamning o‘yinidan qoniqdim. Shunchaki g‘alaba qozona olmadik.

Chuqur himoyalanadigan raqiblarga qarshi uchrashuvlarda nafaqat biz, balki boshqa jamoalar ham qiyinchilikka duch keladi. Agar biz birinchi bo‘limda gol ura olganimizda umuman boshqa tarix bo‘lar, raqib ko‘proq «ochilardi». Futbolda shunday bahslar bo‘ladiki, senga nimanidir o‘rgatadi. Bunday bellashuvlardan nimalardir olsa bo‘ladi. Yigitlarga rahmat, ular uchrashuvga professional tarzda yondoshdi, chunki yutqazib qo‘yish ham mumkin. Hech qayerda o‘yinni yutasan deb yozib qo‘yilmagan.

Urata juda yaxshi saviyadagi futbolchi. Biroq so‘nggi ikki bellashuvda Itsukining o‘rnida harakat qilgan akademiyamiz tarbiyalanuvchisi Narimon Ahmadjonov ajoyib o‘yin namoyish qildi. Mehnat qilishdan to‘xtamasa uni yorqin kelajak kutib turibdi, faqat aytganimdek, hammasiga jiddiy yondoshishi kerak. Hayotda shunday imkoniyatlar bo‘ladi, undan foydalanish shart. Narimon ikkinchi uchrashuvda ham o‘z imkoniyatidan to‘liq foydalandi. Uratani tezroq safimizga qaytishini tilakdoshimiz!