«Barselona» klubi himoyachi Aleks Baldening jarohati bo‘yicha rasmiy bayonot e’lon qildi. Bayonot klubning ijtimoiy tarmoqdagi (X, avvalgi Twitter) rasmiy sahifasida chop etildi.

«Bugungi tekshiruvlar natijasiga ko‘ra, Aleks Baldening chap oyog‘idagi ikki boshli mushakning distal qismida jarohat aniqlandi. Uning maydonga qaytish sanasi tiklanish sur’atiga qarab belgilanadi», — deyiladi klub xabarnomasida.

Avvalroq ommaviy axborot vositalarida tarqalgan xabarlarga ko‘ra, 21 yoshli futbolchi 26 aprel kuni Sevilyada bo‘lib o‘tadigan Ispaniya Kubogi finalida «Real Madrid»ga qarshi uchrashuvni o‘tkazib yuborishi mumkin.

Joriy mavsumda Balde «Barselona» safida barcha musobaqalarda 43 ta uchrashuvda qatnashib, 1 ta gol va 10 ta golli uzatma amalga oshirgan. Uning kataloniyaliklar bilan tuzgan shartnomasi 2028 yil iyun oxirigacha amal qiladi. Transfermarkt portali ma’lumotlariga ko‘ra, futbolchining taxminiy narxi — 60 million yevro.