«Paxtakor» – «Andijon» (2:3) o‘yinidan keyingi matbuot anjumanining ikkinchi qismida mezbonlar bosh murabbiyi Pedro Moreyra qatnashdi.

— O‘yinimiz biroz qiyin kechdi. Uchrashuv davomida tashabbusga erishishga harakat qildik. Birinchi bo‘limda yaxshi o‘yin ko‘rsatayotgandik. Birinchi golni o‘tkazganimizdan keyin o‘yinga o‘zgartirishlar kiritishga harakat qildik. Oldinga o‘tishga intildik. Biroq standart vaziyatlardan gol o‘tkazib yubordik. Shogirdlarim o‘zlarining mahoratlarini ko‘rsatishdi. Ular oxirigacha kurashishdi. Biroq bunday natija bo‘lmasligi kerak edi.  

— G‘alaba qozonish uchun vaziyat yaratish kerak. «Paxtakor» birgina «Mash’al» bilan o‘yinda kuchli taraflarini ko‘rsata oldi. Qolgan uchrashuvlarda esa o‘z darajasida yetarlicha imkoniyatlar yarata olmayapti. Vaholanki, o‘yinchilar hujumkor o‘ynay oladilar. Bu nima bilan bog‘liq?
— Bizga qarshi hamma jamoalar kutib o‘ynashadi. Darvozaga yaqin joyda futbolchilari ko‘p bo‘ladi. Shuning uchun kutishga, ularga qiyinchilik tug‘dirishga harakat qilamiz. Lekin bugun o‘yin davomida ancha yaxshi harakat qildik, ammo natija bo‘lmadi. Birinchi bo‘limda 2-3 ta imkoniyatimiz bo‘ldi. Hatto, darvozaga kirib ketayotgan to‘pni himoyachi qaytarib yubordi. Gol o‘tkazgandan keyin tavakkalchilikka o‘tishga majbur bo‘ldik. Ular standartdan imkon qadar foydalanib ketishdi.

— «Andijon» klubi hali Toshkentda yutmagandi. Tarixda birinchi marta safarda «Paxtakor» ustidan g‘alaba qozonishga muvaffaq bo‘ldi. O‘yindan oldin raqibni qanchalik o‘rgangandingiz?
— Biz raqibni hurmat qilgan holda kim qanaqa o‘ynashini qarab chiqdik. Fikrimcha, bugun to‘p nazorati ko‘proq «Paxtakor»da bo‘ldi. Bor imkoniyatdan gol urishga harakat qildik. Bizga qiyinchilik tug‘dirgan narsa birinchi bo‘lib gol o‘tkazganimiz bo‘ldi. Ammo bunday natija bo‘lmasligi kerak edi. Futbolchilarimiz yaxshi o‘yin ko‘rsatishgandi.

— Nima uchundir «Paxtakor»ning ustun taraflari va rejalari raqibga qarshi o‘tmayapti. Holbuki, raqib o‘z rejalarini o‘tkaza olyapti. «Andijon»ning ustun taraflari – jarima zarbalari, burchak to‘plari va ikkinchi qavatda yaxshi o‘ynaydi. Jamoa o‘z ustunligini ko‘rsata oldi.
— Biz ham buning ustida ishlaganmiz. Misol uchun, hujumda va himoyada qanday o‘ynash borasida o‘ylaganmiz. E’tibor bergan bo‘lsangiz, imkoniyatlarimiz ko‘p bo‘ldi. Faqatgina farqli tomoni, raqib o‘z imkoniyatlaridan foydalanib ketdi.

— O‘yinlardan oldin hamkasbingiz bilan ko‘rishayotganda kichkinagina sovg‘a beryapsiz. Bu nima ekanligi qiziq...
— Bizda shunaqa odat borki, mehmon jamoa kelganda qandaydir sovg‘a beriladi. Chunki bizni stadionga kelgan raqib jamoa murabbiyiga hurmat ko‘rsatish yuzasidan esdalik uchun sovg‘a topshiramiz.

— Bu asalmidi?
— Asosiy narsa, ichida shirinlik narsa va yong‘oq bor.

— «Paxtakor»ga qarshi jamoalar yopiq o‘ynaydi va tempni pasaytirishga harakat qiladi deyilyapti. «Paxtakor» O‘zbekistonning grand klubi bo‘lgani uchun har doim har bir jamoa o‘z kuchidan kelib chiqib, bu jamoaga qarshi himoyaviy o‘yin ko‘rsatib kelgan. Masalan, «Andijon» 10 yil oldin ham «Paxtakor»ga qarshi himoyaviy o‘ynagan. Bu safar ham shunaqa o‘ynayapti, ammo yutib ketyapti...
— Raqib jamoa bizni hurmat qilib kutadi. Yopiq o‘yinlarda ham ular vaziyatlarini kutadi. Biz ham ishlayotganda oldindagi vaziyatlarga tayyorgarlik ko‘ramiz, rejalashtiramiz. Jamoa ham bir hafta davomida ishladi, o‘zini ko‘rsata oldi, sifatli o‘yin ko‘rsatdi. Ayrim o‘yinchilarimizda jarohat bor. To‘g‘risini aytganda, ular bizga yetishmayapti. Jarohatlanganlar safga qaytishsa, jamoamiz yanada kuchayadi. Biz harakat qildik, futbolchilar to‘pni o‘ngdan-chapga uzatib, joy qidirishga harakat qilishdi. Biroq raqib imkoniyatlaridan foydalanib ketdi.