Nikolo Fadjoli o‘zining sportga pul tikish ishi bo‘yicha tergovga oid yangi ma’lumotlarga izoh berdi.

11 aprel kuni ma’lum bo‘lishicha, "Fiorentina" futbolchisining telefonini tekshirish chog‘ida yana 12 nafar futbolchiga noqonuniy saytlar orqali pul tikish holati aniqlangan. Ular orasida Alessandro Florensi, Nikolo Zaniolo, Mattia Perin, Ueston Makkenni, Leandro Paredes va Anxel Di Mariya bor.

"Men adolat oldidagi burchimni bajardim. Futboldan chetlashtirishdi, doimiy xo‘rlashdi, sharmandalik va hech qachon oyoqqa turmaslik xavfini ko‘rdim.

Og‘ir kasalligim haqida maktablar, oilam, do‘stlarim va ommaviy axborot vositalariga gapirib berdim.

Qimor o‘yinlariga qaramlik muammolari va unga qarshi qanday kurashish haqida doimo gapiradigan o‘sha matbuot, bugun yana meni xuddi shu narsani boshdan kechirishga majbur qilmoqda, bu og‘ir.

Men noto‘g‘ri ish qilganim uchun javobgarlikni o‘z zimmamga olaman. Menga ishongan hammaning hafsalasini pir qildim.

Men jabrlanuvchi rolini o‘ynamoqchi emasman, lekin men og‘ir kunlarni boshdan kechirdim va og‘ir xastalikdan aziyat chekdim. Mavzuning ommaviy axborot vositalarida rivojlanishi meni yana bu zolim ahvolga qaytaradi.

Men xato qildim va buning uchun badal to‘ladim. Men o‘zim va atrofimdagilardan boshqa hech kimga yomonlik qilganim yo‘q. Xatoga yo‘l qo‘ygan va uning haqini to‘lagan har qanday odam kabi men ham oyoqqa turishga haqqim bor.

Men bu haqda boshqa gapirmayman. Endi bor e’tiborimni maydonda bor kuchimni berishga qaratishim kerak”, — deb yozdi Fadjoli ijtimoiy tarmoqda.