Николо Фаджоли ўзининг спортга пул тикиш иши бўйича терговга оид янги маълумотларга изоҳ берди.
11 апрель куни маълум бўлишича, "Фиорентина" футболчисининг телефонини текшириш чоғида яна 12 нафар футболчига ноқонуний сайтлар орқали пул тикиш ҳолати аниқланган. Улар орасида Алессандро Флоренци, Николо Заниоло, Маттиа Перин, Уэстон Маккенни, Леандро Паредес ва Анхель Ди Мария бор.
"Мен адолат олдидаги бурчимни бажардим. Футболдан четлаштиришди, доимий хўрлашди, шармандалик ва ҳеч қачон оёққа турмаслик хавфини кўрдим.
Оғир касаллигим ҳақида мактаблар, оилам, дўстларим ва оммавий ахборот воситаларига гапириб бердим.
Қимор ўйинларига қарамлик муаммолари ва унга қарши қандай курашиш ҳақида доимо гапирадиган ўша матбуот, бугун яна мени худди шу нарсани бошдан кечиришга мажбур қилмоқда, бу оғир.
Мен нотўғри иш қилганим учун жавобгарликни ўз зиммамга оламан. Менга ишонган ҳамманинг ҳафсаласини пир қилдим.
Мен жабрланувчи ролини ўйнамоқчи эмасман, лекин мен оғир кунларни бошдан кечирдим ва оғир хасталикдан азият чекдим. Мавзунинг оммавий ахборот воситаларида ривожланиши мени яна бу золим аҳволга қайтаради.
Мен хато қилдим ва бунинг учун бадал тўладим. Мен ўзим ва атрофимдагилардан бошқа ҳеч кимга ёмонлик қилганим йўқ. Хатога йўл қўйган ва унинг ҳақини тўлаган ҳар қандай одам каби мен ҳам оёққа туришга ҳаққим бор.
Мен бу ҳақда бошқа гапирмайман. Энди бор эътиборимни майдонда бор кучимни беришга қаратишим керак”, — деб ёзди Фаджоли ижтимоий тармоқда.
