«Real Madrid» klubi hujumchisi Kilian Mbappe Chempionlar Ligasining chorak final javob bahsida «Arsenal»ga qarshi o‘yinda (1:2) oyog‘idan jarohat oldi va ikkinchi bo‘limda almashtirildi.

"As" nashrining xabar berishicha, dastlabki tibbiy tekshiruv natijalariga ko‘ra, fransiyalik yulduzda oyoq tagidagi bog‘lamalar cho‘zilishi aniqlangan. Bu esa jiddiy jarohat emasligini anglatadi.

«Real» mutaxassislari Mbappening jarohati katta xavotirga sabab bo‘lmasligini ta’kidlashmoqda, biroq keyingi 48 soat ichida u yanada chuqurroq tekshiruvdan o‘tadi. Kilian 26 aprel kuni bo‘lib o‘tadigan Ispaniya kubogi finalida «Barselona»ga qarshi "klassiko"da qatnashishi kutilmoqda.

Shuningdek, Mbappe 20 aprel kuni La Liga doirasida «Atletik»ka qarshi bahsni o‘tkazib yuboradi — u «Alaves»ga qarshi o‘yinda qizil kartochka olgani bois diskvalifikasiya qilingan.