O‘zbekiston Superligasi 6-turi doirasidagi “Andijon”—“Dinamo” hamda “OKMK”—“So‘g‘diyona” bahslari yakuniga yetdi.

“Bobur arena”da kechgan bahsda “Dinamo” 2:1 hisobida g‘alaba qozondi. Uchrashuvdagi hisob 66-daqiqada samarqandliklar tomonidan ochildi. Ulug‘bek Abdullayev Eldor Adhamov darvozasiga gol kiritib, jamoasini hisobda oldinga olib chiqdi. 81-daqiqada “burgutlar” hisobni tenglashtirdi. Gol muallifi — Luka Uskokovich. 90+6-daqiqada “Andijon” hisobda oldinga chiqib olgan edi, biroq Jurikovichning goli ofsayd sabab bekor qilindi. 90+14-daqiqada “Dinamo” gol urib, g‘alabani qo‘lga kiritdi. Uchrashuv yakuni arafasida Firdavs Abdurahmonov gol kiritib, Samarqand klubiga muhim 3 ochko taqdim etdi.

Mazkur g‘alabadan keyin “Dinamo” 12 ochko bilan 4-o‘ringa ko‘tarilib oldi. “Andijon” esa 5-pog‘onadan joy oldi.

Olmaliqda kechga bellashuvda “OKMK” qiyin g‘alabani qo‘lga kiritdi. Dastlab gol o‘tkazib yuborgan “konchilar” yakunda 3 ochkoga ega chiqishni uddaladi. Uchrashuvdagi hisob 47-daqiqada Lyupcho Doriyev tomonidan ochildi. Oradan 5 daqiqa o‘tib, maydon egalari hisobni tenglashtirdi. Gol muallifi — Ali Abdurahmonov. 57-daqiqada Doriyev o‘z dublini rasmiylashtirib, yana “So‘g‘diyona”ni hisobda oldinga olib chiqdi. Ammo Xurshid G‘iyosovning 74 hamda 84-daqiqalarda kiritgan gollari maydon egalariga muhim 3 ochkoni taqdim etdi.

Qo‘lga kiritilgan g‘alabadan keyin “OKMK” ochkolari sonini 16 ballga yetkazib, turnir jadvalining 1-pog‘onasini egallagan bo‘lsa, “So‘g‘diyona” 4 ochko to‘plagan holda 14-o‘rinni egallab turibdi.

O‘zbekiston Superligasi, 6-tur
20 aprel, yakshanba
“Andijon”—“Dinamo” 1:2
Gollar: 0:1 — Ulug‘bek Abdullayev (66), 1:1 — Luka Uskokovich (81), 1:2 — Firdavs Abdurahmonov (90+14)

OKMK—“So‘g‘diyona” 3:2
Gollar: 0:1 — Lyupcho Doriyev (47), 1:1 — Ali Abdurahmonov (52), 1:2 — Lyupcho Doriyev (57), 2:2 — Xurshid G‘iyosov (74), 3:2 — Xurshid G‘iyosov (84)