Ўзбекистон Суперлигаси 6-тури доирасидаги “Андижон”—“Динамо” ҳамда “ОКМК”—“Сўғдиёна” баҳслари якунига етди.

“Бобур арена”да кечган баҳсда “Динамо” 2:1 ҳисобида ғалаба қозонди. Учрашувдаги ҳисоб 66-дақиқада самарқандликлар томонидан очилди. Улуғбек Абдуллаев Элдор Адҳамов дарвозасига гол киритиб, жамоасини ҳисобда олдинга олиб чиқди. 81-дақиқада “бургутлар” ҳисобни тенглаштирди. Гол муаллифи — Лука Ускокович. 90+6-дақиқада “Андижон” ҳисобда олдинга чиқиб олган эди, бироқ Журиковичнинг голи офсайд сабаб бекор қилинди. 90+14-дақиқада “Динамо” гол уриб, ғалабани қўлга киритди. Учрашув якуни арафасида Фирдавс Абдураҳмонов гол киритиб, Самарқанд клубига муҳим 3 очко тақдим этди.

Мазкур ғалабадан кейин “Динамо” 12 очко билан 4-ўринга кўтарилиб олди. “Андижон” эса 5-поғонадан жой олди.

Олмалиқда кечга беллашувда “ОКМК” қийин ғалабани қўлга киритди. Дастлаб гол ўтказиб юборган “кончилар” якунда 3 очкога эга чиқишни уддалади. Учрашувдаги ҳисоб 47-дақиқада Люпчо Дориев томонидан очилди. Орадан 5 дақиқа ўтиб, майдон эгалари ҳисобни тенглаштирди. Гол муаллифи — Али Абдураҳмонов. 57-дақиқада Дориев ўз дублини расмийлаштириб, яна “Сўғдиёна”ни ҳисобда олдинга олиб чиқди. Аммо Хуршид Ғиёсовнинг 74 ҳамда 84-дақиқаларда киритган голлари майдон эгаларига муҳим 3 очкони тақдим этди.

Қўлга киритилган ғалабадан кейин “ОКМК” очколари сонини 16 баллга етказиб, турнир жадвалининг 1-поғонасини эгаллаган бўлса, “Сўғдиёна” 4 очко тўплаган ҳолда 14-ўринни эгаллаб турибди.

Ўзбекистон Суперлигаси, 6-тур
20 апрель, якшанба
“Андижон”—“Динамо” 1:2
Голлар: 0:1 — Улуғбек Абдуллаев (66), 1:1 — Лука Ускокович (81), 1:2 — Фирдавс Абдураҳмонов (90+14)

ОКМК—“Сўғдиёна” 3:2
Голлар: 0:1 — Люпчо Дориев (47), 1:1 — Али Абдураҳмонов (52), 1:2 — Люпчо Дориев (57), 2:2 — Хуршид Ғиёсов (74), 3:2 — Хуршид Ғиёсов (84)