"Manchester Siti" yarim himoyachisi Kevin de Bryuyne Angliya Premyer-ligasining boshqa bir klubi qiziqishlari doirasiga tushib qoldi.
"Shaharliklar" belgiyalik futbolchining muddati tugayotgan shartnomasini uzaytirmaslikka qaror qilgan, shu bois u yozdayoq erkin agentga aylanadi. Taxminlarga ko‘ra, yulduz yarim himoyachi katta ehtimol bilan Yevropani tark etadi - unga MLS va Saudiya Arabistonida talab bor, ammo futbolchida Angliyada variant paydo bo‘lishi mumkin. Jurnalist Melissa Reddi xabariga ko‘ra, de Bryuyneni taklif qilish imkoniyatini "Aston Villa" ko‘rib chiqmoqda. Klubda ehtimoliy bitim bo‘yicha ichki muhokamalar olib borilmoqda.
Iyun oyida Kevin de Bryuyne 34 yoshga to‘ladi. U o‘n yil davomida "Manchester Siti" sharafini himoya qilib kelmoqda.













