"Surxon" bosh murabbiyi Fevzi Davletov O‘zbekiston kubogining 2-turi doirasida bo‘lib o‘tgan "Dinamo"ga qarshi o‘yin (0:1) borasida o‘z fikrlari bilan o‘rtoqlashdi.

— Gol o‘tkazilgan paytda himoya ish bermadi. Shu goldan keyin jamoa o‘zini to‘plab oldi va o‘yini yaxshilanib bordi. Menimcha, biz o‘yin jihatdan raqibdan ustun edik. Ammo yana gol yo‘q va gol urishda muammo bor. Yo to‘p darvoza tomon aniq bormaydi, yoki raqib darvozaboni jamoasini qutqaradi. Biz ko‘plab hujumlar yaratamiz, lekin gol ura olmaymiz.

— Sizningcha, nega o‘tgan o‘yinda himoyachilar darvozamizni daxlsiz saqlagan bo‘lsa-da, bu safar ular almashtirildi?

— Biz tarkibda rotasiya qildik, chunki oldimizda “Paxtakor”ga qarshi og‘ir o‘yin kutilmoqda. Murabbiylar shtabi bilan maslahatlashib, aynan shu tarkibni tanladik. Menimcha, golga olib kelgan ikki xatolik markaziy himoyachilar juftligining hali to‘liq o‘yin ichida kelishib ishlamasligidan sodir bo‘ldi. Oldingi o‘yinlarda himoya ancha muvofazanatlashgan edi. Va, albatta, Nodirxon Ne’matxonovning yo‘qligi biz uchun katta yo‘qotish bo‘ldi. Ushbu o‘yinga aynan uni tayyorlayotgandik, ammo u shamollab qoldi. Bu o‘yinni unutishimiz kerak, endi “Paxtakor”ga tayyorgarlik ko‘rish vaqti keldi.

— Tashqaridan qaraganda, hujumda o‘zaro tushunish yetarli emasdek tuyuladi. Mashg‘ulotlarda bu yo‘nalishda ish olib boryapsizmi?

— Albatta ish olib boryapmiz. Ammo futbolchilar raqib bosimi va tribunalar qarshisida ham o‘z imkoniyatlaridan foydalanishni bilishlari kerak.

— Futbolchilar harakatlarida ko‘p hujumkor o‘yin ko‘rdik. Va futbolchilar rotasiyasi o‘zini oqladi. Tushunarli, ko‘plab futbolchilarga “Paxtakor”ga qarshi o‘yin oldidan dam berildi. Ammo keyingi o‘yinlarda ham rotasiya bo‘ladimi?

— “Paxtakor”ga qarshi jangovor tarkib o‘ynaydi. Bugungi o‘yinda qatnashmagan futbolchilarning ko‘pchiligi o‘tgan “Mash’al”ga qarshi o‘yinda katta kuch sarfladi. Bilasiz, “Dinamo” bugungi o‘yinga ancha tayyor holatda keldi, chunki ularda tayyorgarlikka ko‘proq vaqt bo‘ldi. Biz ongli ravishda rotasiyaga bordik.

— Bugun ko‘plab muxlislar va jurnalistlar Dostonbek Tursunovni Andres Inyesta bilan qiyoslashdi. Sizningcha, u o‘z o‘yinini yanada takomillashtirish imkoniyatiga ega bo‘ladimi?

— Har bir futbolchi o‘z o‘yinini yaxshilashi mumkin. Doston Tursunov ham shular jumlasidandir.