Jahon shaxmat federasiyasi aprel oyi yakunlangach, o‘z reytingini yangiladi. Ushbu yangilangan jahon reytingida kuchli 100 likdan 5 nafar o‘zbekistonlik grossmeyster o‘rin oldi.

Yangilangan reytingda O‘zbekistonning birinchi raqamli shaxmatchisi Nodirbek Abdusattorov 6-pog‘onada qoldi, ammo uning ochkolari 1,9 ballga kamaydi (6-o‘rin. 2771.1 ochko).

Javohir Sindorov aprel oyida reyting uchun 0,1 ochko qo‘lga kiritishni uddalagan, lekin  o‘zbekistonlik grossmeyster bir pog‘ona pastlab, 30-o‘rindan 31-o‘ringa tushdi. Hozirda Javohir hisobida 2706,1 ball bor.  Ta’kidlash kerakki, Sindorov o‘tgan oyda ham bir pog‘ona pastlagan edi.

Tajribali shaxmatchi Rustam Qosimjonov (2675) ham mazkur reytingning kuchlilar qatoridan joy olgan. U aprel oyida 2 pog‘ona pastlab, 48-o‘rinni egallagan.

Mart oyida O‘zbekistonning eng kuchli 4-shaxmatchisiga aylangan Nodirbek Yakubboyev (2665) aprel oyida ham o‘z mavqeini saqlab qoldi. Shuningdek, u reytingda ham 1 pog‘ona ko‘tarilishga erishdi. Yakubboyev ayni paytda FIDE reytingida 60-pog‘onani egallab turibdi.

Shamsiddin Vohidov aprel oyi reytingida ham pastladi. Bilasiz, o‘zbekistonlik grossmeyster o‘tgan oy 30 pog‘ona pastlab, 80-o‘ringa tushib ketgan edi. Vohidov yangilangan reytingda 86-o‘ringa tushdi. Uning hisobidagi ochkolar soni 2641 ni tashkil qiladi.

Yoshlar o‘rtasidagi reytingda Javohir Sindorov kuchli uchlikda qoldi — 2706,1.