Qanot himoyachisi Jyul Kunde kecha UYEFA Chempionlar Ligasi yarim finalining birinchi o‘yini davomida "Inter"ga qarshi o‘yinda chap sonining orqa qismida og‘riq sezib, birinchi bo‘lim tugashidan oldin maydonni tark etdi.

Kataloniyaliklar rasmiy bayonotida, tibbiy tekshiruvlar natijasida fransiyalik himoyachining chap sonining orqa qismida (biseps femoris) distal mushak jarohati aniqlangani ma’lum qilindi. Qaytish muddati uning sog‘ayishiga bog‘liq bo‘lib, taxminan 2-3 hafta davomida safdan chiqishi kutilmoqda .

Bu jarohat sababli Kunde quyidagi muhim o‘yinlarni o‘tkazib yuboradi:

7 may kuni "San-Siro"da "Inter"ga qarshi Chempionlar Ligasi yarim finalining javob o‘yini.

11 may kuni "Real Madrid"ga qarshi La Liga doirasidagi "El-klasiko".

Agar sog‘ayish jarayoni muvaffaqiyatli kechsa, Kunde La Liganing so‘nggi ikki turida yoki 31 may kuni bo‘lib o‘tadigan Chempionlar Ligasi finalida maydonga qaytishi mumkin.

Kundening yo‘qligi "Barselona" himoyasi uchun jiddiy yo‘qotish bo‘lib, u joriy mavsumda asosiy o‘yinchilardan biri edi. Murabbiy Xansi Flik uning o‘rnini to‘ldirish uchun Erik Garsiya, Ronald Arauxo yoki yosh futbolchi Ektor Fort kabi variantlarni ko‘rib chiqmoqda.

Ushbu jarohat "Barselona" uchun mavsumning hal qiluvchi bosqichida katta sinov bo‘lib, jamoa Chempionlar Ligasi finaliga chiqish va La Liga chempionligini qo‘lga kiritish uchun kurashmoqda.