“Roma” bosh murabbiyi Klaudio Raneri A Seriya doirasidagi “Fiorentina”ga qarshi o‘yindan oldin matbuot anjumanida ishtirok etib, O‘zbekiston terma jamoasi a’zosi Eldor Shomurodov haqida gapirdi. Bu haqda Roma Press nashri xabar bermoqda.

Mutaxassis Shomurodov haqida to‘xtalar ekan, u haqida iliq fikrlarni bildirdi:

"Shomurodov ertangi o‘yinda Dovbik bilan birga maydonga tushishi mumkin. Eldor — jamoaning asosiy futbolchisi. U o‘zini o‘yinga 100 foizga bag‘ishlaydi. Ko‘p marta bosim ostida ishladi, lekin umuman ortga chekingani yo‘q. Uni aynan shuning uchun yaxshi ko‘raman. Eldor —  tilla yigit", — deydi Raneri o‘yindan oldingi matbuot anjumanida.

Ma’lumot uchun, Shomurodov joriy mavsum rimliklar libosida 33 ta uchrashuvda maydonga tushib, o‘z hisobiga 7 gol va 4 golli uzatma yozdirib qo‘ygan. Avvalroq hujumchi “Roma”ning aprel oyidagi eng yaxshi futbolchisi deb topilgan edi.

Eslatib o‘tamiz, “Roma”—“Fiorentina” uchrashuvi 4 may kuni bo‘lib o‘tadi. Uchrashuv Toshkent vaqti bilan 21:00 da boshlanadi.