Milanning "Inter" klubida Simone Indzagining yordamchisi bo‘lib ishlayotgan Massimiliano Farris hujumchi Lautaro Martinesning holati haqida gapirdi.

Argentinalik futbolchi shanba kuni bo‘lib o‘tgan A Seriya doirasidagi "Verona"ga qarshi o‘yinda "Barselona"ga qarshi Chempionlar Ligasi yarim final dastlabki bahsida olgan jarohati tufayli maydonga tushmadi.

"Neradzurrilar"ning chempionatdagi g‘alabali o‘yini (1:0) yakunlangach, jurnalistlar Farrisdan kataloniyaliklar bilan javob o‘yinida sardorning maydonga tushishi qanchalik haqiqatga yaqinligini so‘rashdi.

"Men Lautaro "Barselona" bilan o‘ynashdan ko‘ra, o‘ynamasligini aytgan bo‘lardim," - dedi Indzagining yordamchisi matbuot anjumanida.