2004-2006 yillarda Roberto Manchini qo‘l ostida Milanning "Inter" klubi yordamchi murabbiyi bo‘lib ishlagan Fernando Orsi "Inter"ning Kataloniyaning "Barselona" klubiga qarshi bo‘lajak o‘yini haqida o‘z fikrlari bilan o‘rtoqlashdi. Bu Chempionlar ligasi yarim finalining javob uchrashuvi bo‘ladi, birinchi o‘yinda jamoalar 3:3 hisobida durang o‘ynashgan.
"San-Siro omili "Barselona"ga katta xalaqit beradi, deb o‘ylamayman, u turli stadionlarda o‘ynashga odatlangan va unga qarshi har doim ko‘pchilik muxlislik qilishga harakat qiladi. Qolaversa, "Barselona"da Levandovski sog‘ayib ketadi, bu esa, albatta, klub uchun qo‘shimcha qiymat," - deya Orsining so‘zlarini keltiradi fcinter1908.it.
