"Real" tarkibni kuchaytirish uchun yosh iqtidorlarni izlashda davom etmoqda va bu safar "Pari Sen-Jermen"ning umidli vingeriga e’tibor qaratdi. Gap Dezire Due haqida ketyapti. Rodrigo yaqin oylarda klubni tark etishi mumkinligini inobatga olib, "qaymoqranglilar" rahbariyati Dueni braziliyalik futbolchiga ideal o‘rinbosar sifatida ko‘rmoqda.

"Fichajes" nashri xabariga ko‘ra, "qaymoqranglilar" futbolchining transferi uchun 100 million yevrogacha mablag‘ sarflashga tayyor - bu uning hozirgi bozor narxidan ancha yuqori, ammo Duening iste’dodiga bo‘lgan katta ishonchdan dalolat beradi.

Agar transfer amalga oshsa, Due nafaqat bugungi, balki Madrid klubining kelajakdagi hujum chizig‘ining asosiy elementiga aylanadi. Bu bilan "qaymoqranglilar" Yevropaning eng kuchli klublari orasida o‘z mavqeini yanada mustahkamlab olishni maqsad qilgan.

Ma’lumot uchun, 19 yoshli fransuz bu mavsumda "PSJ" safida barcha musobaqalarda 49 ta o‘yinda maydonga tushib, 13 ta gol va 12 ta golli uzatmaga mualliflik qilgan.