"Barselona"ning La Ligadagi navbatdagi o‘yinlaridan biri muxlislarsiz o‘tishi mumkin. Gap 15 may sanasiga belgilangan "Espanyol"ga qarshi safar derbisi haqida ketmoqda.

"Espanyol"ning "Betis"ga qarshi yakshanba kungi o‘yinida muxlislar maydonga yondirgichlar uloqtirishgan va hakam o‘yinni to‘xtatgan. Stadionda tartibsizliklar davom etsa, o‘yin bekor qilinishi mumkinligi haqida e’lon qilindi. O‘yin muammosiz davom etdi.

Biroq, 2024 yilda "Espanyol" allaqachon muxlislarning xatti-harakatlari uchun jazolangan edi. O‘shanda klub 3 ming yevro miqdorida jarimaga tortilgan va qoidabuzarlik takrorlansa, stadion muxlislar uchun yopilishiga ishora qilingan. Natijada "Espanyol" - "Barselona" uchrashuvi muxlislarsiz o‘tishi mumkin, deb yozadi Goal portali.