Bugun, 7 may kuni Birlashgan Arab Amirliklarining Al-Ayn shahrida shaxmat bo‘yicha erkaklar va ayollar o‘rtasida 2025 yilning eng muhim musobaqalaridan biri bo‘lgan Osiyo chempionati bahslari boshlanadi.
Qit’aning 34 ta mamlakatidan 260 nafardan ziyod eng mahoratli shaxmatchilar ishtirok etadigan mazkur chempionatda yurtimiz sharafini erkaklar bahsida 12 nafar, ayollar musobaqasida 15 nafar terma jamoamiz a’zolari himoya qiladi.
Erkaklar musobaqalarida Nodirbek Yoqubboyev Shamsiddin Vohidov, Muhiddin Madaminov, Muhammadzohid Suyarov, Humoyun Bekmuratov yetakchilar qatorida e’tirof etilgan bo‘lsa, ayollar bahslarida Afro‘za Hamdamova, Guldona Karimova, Umida Omonovalar bilan bir safda bu yildan e’tiboran Gulruhbegim Tohirjonova Osiyo chempionligi uchun kurashga kirishadi.
2025 yilning 5-29 iyul kunlari Gruziyaning Botumi shahrida ayollar o‘rtasida hamda 31 oktyabr-27 noyabr kunlari Hindistonda erkaklar o‘rtasida o‘tadigan jahon kubogiga saralash vazifasini o‘taydigan qit’a birinchiligi 9 ta turdan iborat bo‘lib, musobaqalar 16 mayga qadar davom etadi.
Al-Ayn shahrida kechadigan shaxmat janglarida eng yaxshi natija qayd etgan 10 nafar erkak va 2 nafar ayol shaxmatchi jahon kubogi yo‘llanmasini qo‘lga kiritadi.
