"Barselona" hujumchisi Ansu Fati bir necha bor shov-shuvli tungi bazmlar uyushtirishda ayblanganidan keyin qo‘shnilari va OAVning diqqat markazida bo‘ldi.
ABC xabariga ko‘ra, 22 yoshli futbolchining kvartirasidagi bazmlar kechga yaqin boshlanib, tonggacha davom etadi. Turar joy majmuasi aholisi baland musiqa va qichqiriqlar dam olishga xalaqit berayotganidan shikoyat qilmoqda.
Qo‘shnilardan birining aytishicha, u bir necha bor shovqinni kamaytirishni so‘ragan, ammo natija bo‘lmagan. Polisiya bir necha bor futbolchiga tinchlik rejimini buzgani uchun jarima solgan, biroq Fatining xatti-harakatlari o‘zgarmagan. Oxir-oqibat, doimiy tashvishlardan charchagan qo‘shnilar matbuotga murojaat qilib, vaziyatni ommaga e’lon qilishga qaror qilishdi.













