Bu yozda "Real" himoya chizig‘ida jiddiy o‘zgarishlarga tayyorgarlik ko‘rmoqda. Jamoaga Trent Aleksandr-Arnold va Din Xeysen qo‘shiladi. Madridliklar chap qanot himoyachisi borasida ham faol muzokaralar olib bormoqda. Ularning asosiy nishoni "Benfika" futbolchisi Alvaro Karreras bo‘ldi. Agar transfer amalga oshsa, bu himoya uchun uchinchi imzo bo‘ladi.

Bunday kuchaytirishlardan keyin klubni kim tark etishi noma’lumligicha qolmoqda. Hozircha yagona aniq yo‘l - bu tajribali Lukas Vaskes, uning shartnomasi yakunlanmoqda.

Ammo qayta qurishning ehtimoliy "qurbonlari" orasida David Alaba ham bo‘lishi mumkin. 32 yoshli avstriyalik tizzasidan olgan og‘ir jarohat tufayli 13 oyni o‘tkazib yuborgan va yanvar oyidagina o‘yinga qaytgandi. Uning yangi murabbiy Xabi Alonso qo‘l ostidagi jamoadagi kelajagi hozircha mavhum. Cadena SER ma’lumotlariga ko‘ra, yanvar oyida unga hatto yil oxirigacha maosh to‘lash sharti bilan shartnomani muddatidan oldin bekor qilish taklif qilingan. Biroq Alaba taklifni rad etdi.

Eslatib o‘tamiz, Alaba joriy mavsum "Real" safida barcha musobaqalarda 14 ta o‘yinda maydonga tushdi.