"Manchester Siti" bosh murabbiyi Xosep Gvardiola yarim himoyachi Klaudio Echeverrining "Bornmut"ga qarshi o‘yin qaydnomasiga kiritilmaganiga izoh berdi.
Seshanba kuni bo‘lib o‘tgan Premyer-liganing 37-turidan o‘rin olgan uchrashuv "shaharliklar"ning 3:1 hisobidagi g‘alabasi bilan yakunlandi. Bahs yakunlangach, jurnalistlar ispaniyalik murabbiydan nega Angliya kubogining so‘nggi finalida debyut qilgan va maqtovlarga sazovor bo‘lgan Echeverrini yana qaydnomaga kiritmaganini so‘rashdi.
"U tor hududlarda - "Sautgempton" va "Kristal Pelas" kabi chuqur himoyalanuvchi raqiblarga qarshi o‘yinda juda yaxshi harakat qiladi. "Bornmut" - hujum jamoasi, ochiqroq va Echeverri hozircha bunday o‘yinlarda o‘ynashga tayyor emas. Yoki tayyor, lekin buni hali tushunmadim," - deya Gvardiolaning javobini keltiradi City Report.
