Madridning “Real” klubi Frankfurtning “Ayntraxt” jamoasi yarim himoyachisi Xugo Larssonni yozda o‘z safiga qo‘shib olish imkonini sinchiklab o‘rganmoqda. Bu haqda Fabrisio Romano va Yevropa nashrlari xabar tarqatdi.

19 yoshli shved futbolchisi joriy mavsumda Bundesligada yorqin o‘yinlari bilan diqqatga tushdi. U 2023 yil yozida “Malmyo”dan “Ayntraxt”ga 9 million yevroga kelib qo‘shilgan va darhol asosiy tarkib futbolchisiga aylangan. Transfermarkt ma’lumotiga ko‘ra, u 2024/25 yilgi mavsumda 47 ta rasmiy o‘yinda ishtirok etdi va 6 ta gol hamda 2 ta assist muallifi bo‘ldi.

Futbolchining iqtidori nafaqat “Real”, balki “Manchester Siti” va “Tottenxem” kabi Angliya grandlarini ham o‘ziga jalb etgan. Xususan, Pep Gvardiola boshchiligidagi “shaharliklar” uni kelajakda Rodriga alternativ variant sifatida ko‘rmoqda.

Larssonning “Ayntraxt” bilan amaldagi shartnomasi 2029 yilgacha mo‘ljallangan va frankfurtliklar uning narxini kamida 40 million yevro deb baholamoqda.

Hozircha “Real” tomonidan rasmiy taklif berilmagan, biroq skautlar uning har bir o‘yinini kuzatib bormoqda. Ayniqsa, Luka Modrich kabi tajribali futbolchining jamoani tark etayotgani fonida “qirollik klubi” yosh yarim himoyachilarni o‘z safida ko‘rishga harakat qilmoqda.