Мадриднинг “Реал” клуби Франкфуртнинг “Айнтрахт” жамоаси ярим ҳимоячиси Хуго Ларссонни ёзда ўз сафига қўшиб олиш имконини синчиклаб ўрганмоқда. Бу ҳақда Фабрицио Романо ва Европа нашрлари хабар тарқатди.

19 ёшли швед футболчиси жорий мавсумда Бундеслигада ёрқин ўйинлари билан диққатга тушди. У 2023 йил ёзида “Мальмё”дан “Айнтрахт”га 9 миллион еврога келиб қўшилган ва дарҳол асосий таркиб футболчисига айланган. Transfermarkt маълумотига кўра, у 2024/25 йилги мавсумда 47 та расмий ўйинда иштирок этди ва 6 та гол ҳамда 2 та ассист муаллифи бўлди.

Футболчининг иқтидори нафақат “Реал”, балки “Манчестер Сити” ва “Тоттенхэм” каби Англия грандларини ҳам ўзига жалб этган. Хусусан, Пеп Гвардиола бошчилигидаги “шаҳарликлар” уни келажакда Родрига альтернатив вариант сифатида кўрмоқда.

Ларссоннинг “Айнтрахт” билан амалдаги шартномаси 2029 йилгача мўлжалланган ва франкфуртликлар унинг нархини камида 40 миллион евро деб баҳоламоқда.

Ҳозирча “Реал” томонидан расмий таклиф берилмаган, бироқ скаутлар унинг ҳар бир ўйинини кузатиб бормоқда. Айниқса, Лука Модрич каби тажрибали футболчининг жамоани тарк этаётгани фонида “қироллик клуби” ёш ярим ҳимоячиларни ўз сафида кўришга ҳаракат қилмоқда.