O‘zbekiston Superligasi 11-turi doirasidagi “Paxtakor” — “Xorazm” uchrashuvi yakuniga yetdi. Qiziqarli o‘tgan bahsda “sherlar” 2:1 hisobidagi qiyin g‘alabani qo‘lga kiritdi.

Uchrashuvdagi hisob mehmonlar tomonidan ochildi. 5-daqiqada Temur Ismoilov Jonatan darvozasini ishg‘ol qildi.


Shundan keyin har ikki jamoa ham navbatma-navbat hujum uyushtirdi. 24-daqiqada Bashar Resanning uzatmasidan keyin Igor Sergeev “Xorazm” darvozasini ishg‘ol qilib, umumiy natijani tenglashtirdi. Birinchi taym 1:1 hisobida yakunlandi.

Ikkinchi bo‘lim ham qiziqarli kechdi. “Paxtakor” ko‘proq to‘pni nazorat qilgan bo‘lsa-da, Urganch klubi ham ko‘plab xavfli vaziyatlar yaratishni uddaladi. Ammo uchrashuv yakuni arafasida “sherlar” bari-bir raqib darvozasini ishg‘ol qildi. 90+8-daqiqada Hojiakbar Alijonov tomonidan uzatilgan to‘pni Vladimir Bubanya o‘z darvozasiga burib yubordi. Natijada “Paxtakor” juda muhim 3 ochkoni qo‘lga kiritdi.

Ushbu natijadan keyin “Paxtakor” hisobidagi ochkolar soni 18 taga yetdi va ular turnir jadvalida bir pog‘ona yuqorilab, 6-o‘rinni egalladi. 12 ochkosi bor “Xorazm” esa 12-pog‘onani band etgan.

O‘zbekiston Superligasi, 11-tur
25 may, yakshanba
“Paxtakor” — “Xorazm” 2:1
Gollar: 0:1 — Temur Ismoilov (5), 1:1 — Igor Sergeev (24), 2:1 — Vladimir Bubanya (90+8, avtogol)