Fransiya terma jamoasi bosh murabbiyi Didye Desham Parij klubining Chempionlar Ligasidagi g‘alabasidan so‘ng «PSJ» hujumchisi Usmon Dembelening «Oltin to‘p»ni qo‘lga kiritish imkoniyatini baholadi. «PSJ» finalda Milanning «Inter» jamoasini 5:0 hisobida mag‘lub etdi.

«Chempionlar Ligasidagi g‘alaba — bu a’lo, lekin ovoz berish huquqiga ega bo‘lgan jurnalistlar qaror qiladi va mavsum hali yakunlanmagan. Menimcha, bugungi kunda birinchi uchlik nomzodni aniqlash qiyin.

Mbappe ham bor — u La Liganing eng yaxshi to‘purari va «Oltin butsa» sohibidir, garchi u yaqinda boshqa klubga o‘tgan bo‘lsa ham. Yoki Lamin Yamal, menimcha, u ham o‘zini yaxshi ko‘rsata oldi... Nima uchun Levandovski yoki Rafinya emas?» — deydi Desham Gazzetta dello Sport nashriga bergan intervyusida.

Usmon Dembele 2024/2025 yilgi mavsumda Chempionlar Ligasining eng yaxshi o‘yinchisi deb topildi. 28 yoshli hujumchi turnir doirasida 15 ta o‘yinda qatnashib, 8 ta gol va 6 ta golli uzatma muallifi bo‘ldi. Final uchrashuvida esa u ikki marta assist qildi.