Ispaniyaning El Chiringuito telekanali jurnalisti Xosep Pedrerol «Real Madrid» jamoasining transferlari haqida ma’lumot berdi.

Manbaning xabar berishicha, «Real» Lissabonning «Benfika» jamoasida to‘p surayotgan chap qanot himoyachisi Alvaro Karrerasni sotib olish bo‘yicha kelishuvga erishgan va futbolchini Klublar o‘rtasidagi jahon chempionatida jamoa safida o‘ynatish uchun shartnoma tuzish arafasida turibdi. Buning uchun madridliklar portugaliyalik klubga ma’lum miqdorda kompensasiya to‘laydi. Qayd etish joizki, «Benfika» ham ushbu musobaqada ishtirok etadi.

Shuningdek, Pedrerolning ta’kidlashicha, «Real» rahbariyati braziliyalik vinger Rodrigo Goes jamoada qolishni istash-istamasligi borasida oldingiday ishonchga ega emas. Klub futbolchining ketish ehtimolini istisno qilmayapti va unga munosib o‘rinbosar qidirilishi mumkin.

Ma’lumot uchun, 22 yoshli Karreras o‘tgan mavsumda «Benfika» tarkibida barcha musobaqalarda 50 ta o‘yinda ishtirok etgan, 4 ta gol urgan va 5 ta golli pas bilan to‘plagan. Uning klub bilan amaldagi shartnomasi 2029 yil yozigacha mo‘ljallangan. Transfermarkt portali ma’lumotlariga ko‘ra, futbolchining bozor bahosi 35 million yevroni tashkil qiladi.

Rodrigo esa o‘tgan mavsumda 50 ta o‘yinda maydonga tushib, 13 ta gol va 10 ta golli uzatma bilan ishtirok etgan. Uning «Real» bilan amaldagi shartnomasi 2028 yil yozigacha amal qiladi. Transfermarkt'da keltirilgan ma’lumotga ko‘ra, uning taxminiy narxi 100 million yevroni tashkil qiladi.