“Roma” Jan Pyero Gasperini bilan kelishuvga erishdi. ESPN nashri xabariga ko‘ra, tajribali mutaxassis yangi mavsumdan boshlab rimliklarni boshqaradi. O‘zbekiston terma jamoasi va “Roma” hujumchisi Eldor Shomurodov bu yangilik yuzasidan o‘z fikrlarini bildirdi.

Hujumchi YouTube’dagi Comment Show podkastida italiyalik murabbiyning “Roma”ga kelishi haqidagi savollarga javob berdi.

— Eldor, rasmiy manbalarga ko‘ra, Gasperini “Roma” bosh murabbiyi sifatida ish boshlaydi. Uning oldingi faoliyati haqida qanday fikrdasan? U bilan ishlashda qiyinchiliklar bo‘lmaydimi?

— Hali yangilikdan xabardor emasman, hozir mashg‘ulotdan chiqdim.

— Ayni paytda bu yangilik e’lon qilindi.

— Yaxshi yangilik. Chunki Gasperini “Atalanta”ni noldan olib chiqib, Chempionlar Ligasi darajasiga yetkazgani hamma uchun ma’lum. Hozir ham ular chempionlik uchun kurashmoqda. O‘ylaymanki, u “Roma”da ham yaxshi natijalarga erishadi.

— Uning o‘yin uslubi haqida qanday fikrdasan? Jismoniy tayyorgarlik va yuqori pressingga asoslangan o‘yin senga mos keladimi?

— Bu haqida hozircha gapirish erta. Mening o‘yin uslubim ham Gasperinining talablariga javob beradi deb o‘ylayman.

Ma’lumotlarga ko‘ra, “Roma” Gasperini bilan 2028 yilgacha mo‘ljallangan shartnoma imzolagan.

Eslatib o‘tamiz, Klaudio Ranyeri mavsum yakunida “Roma” boshqaruvidan ketdi va klub tizimida faoliyat yuritmoqda.