Madridning “Real” klubi hujumkor yarim himoyachi Franko Mastantuononi sotib olishga yaqin turibdi. "River Pleyt"da o‘ynayotgan 17 yoshli futbolchi allaqachon "PSJ" bilan kelishuvga erishgan - vunderkindning Parijga o‘tishi deyarli muqarrar ekani xabar qilingandi.

Jurnalist Patrik Bergerning yangilangan ma’lumotlariga ko‘ra, endilikda "Real" argentinalik uchun kurashda peshqadamlik qilmoqda. Futbolchi dastlab "Qirollik klubi"ga o‘tishni orzu qilgan, shu bois "PSJ"ning bahsda ustunlikni qo‘lga kiritishi nihoyatda qiyin bo‘ladi. Madrid klubi rahbariyati shartnomani yaqin vaqt ichida – klublar o‘rtasidagi jahon chempionati boshlanishidan oldin yopish niyatida.

Transfermarkt portali Franko Mastantuononing narxini 30 million yevroga baholamoqda, "River Pleyt" bilan shartnomadagi sotib olish bandi esa taxminan 45 million yevroni tashkil qiladi.