Angliyaning "Manchester Yunayted" klubi Lissabonning "Sporting" jamoasi hujumchisi Viktor Dyokereshni sotib olishga tayyor, deya xabar bermoqda jurnalist va insayder Nikolo Skira X ijtimoiy tarmog‘ida. Manbaga ko‘ra, shvesiyalik forvard 65 million yevro evaziga Portugaliya klubini tark etishi mumkin.
Eslatib o‘tamiz, avvalroq 26 yoshli hujumchiga Londonning "Arsenal" klubi qiziqayotgani haqida xabar berilgandi. Qayd etilishicha, "kanonirlar" Viktorning transferi borasida "Sporting" bilan deyarli kelishuvga erishgan. Dyokeresh Portugaliya klubida 2023 yilning iyulidan beri o‘ynab kelmoqda, o‘shanda u "Koventri"dan 24 million yevro evaziga ko‘chib o‘tgan. Ilgari u "Brayton" tarkibida Premyer-ligada o‘ynagan.
Yakunlangan mavsumda Dyokeresh barcha turnirlarda 52 ta uchrashuvda qatnashib, 54 ta gol urdi va 13 ta golli uzatmani amalga oshirdi. Futbolchining klub bilan amaldagi mehnat shartnomasi 2028 yilning yoziga qadar tuzilgan.
