Англиянинг "Манчестер Юнайтед" клуби Лиссабоннинг "Спортинг" жамоаси ҳужумчиси Виктор Дьёкерешни сотиб олишга тайёр, дея хабар бермоқда журналист ва инсайдер Николо Скира Х ижтимоий тармоғида. Манбага кўра, швециялик форвард 65 миллион евро эвазига Португалия клубини тарк этиши мумкин.
Эслатиб ўтамиз, аввалроқ 26 ёшли ҳужумчига Лондоннинг "Арсенал" клуби қизиқаётгани ҳақида хабар берилганди. Қайд этилишича, "канонирлар" Викторнинг трансфери борасида "Спортинг" билан деярли келишувга эришган. Дьёкереш Португалия клубида 2023 йилнинг июлидан бери ўйнаб келмоқда, ўшанда у "Ковентри"дан 24 миллион евро эвазига кўчиб ўтган. Илгари у "Брайтон" таркибида Премьер-лигада ўйнаган.
Якунланган мавсумда Дьёкереш барча турнирларда 52 та учрашувда қатнашиб, 54 та гол урди ва 13 та голли узатмани амалга оширди. Футболчининг клуб билан амалдаги меҳнат шартномаси 2028 йилнинг ёзига қадар тузилган.
