"Lasio"ning chap qanot himoyachisi Nunu Tavareshga transfer bozorida talab bor.
Rimliklar portugaliyalikni Londonning "Arsenal" klubidan 5 mln yevroga sotib oldi, ammo tez orada uni ancha qimmatga sotishi mumkin. Insayder Nikolo Skiraning ma’lum qilishicha, vaziyatni "Yuventus" kuzatib bormoqda, "keksa sinyora"ga Angliya Premyer-ligasi va Saudiya Arabistoni chempionatining nomi oshkor etilmagan klublari raqobatchi bo‘lishga tayyor.
Nunu Tavaresh o‘tgan mavsumda "Lasio" safida 30 ta o‘yinda 9 ta golli uzatmani amalga oshirdi. Nufuzli Transfermarkt portali talqiniga ko‘ra, 25 yoshli lateral futbolchining narxi 25 mln yevroni tashkil etadi.
