Bugun O‘zbekiston futzal federatsiyasi anjumanlar zalida 2025/2026 yilgi mavsum Oliy ligada qatnashish huquqini beruvchi O‘tish turniriga qur’a tashlash marosimi bo‘lib o‘tdi. Unda O‘zbekiston terma jamoasi o‘yinchisi Husniddin Nishonov ishtirok etdi.

18-23 iyun sanalarida Jizzax shahridagi olimpiya o‘rinbosarlari oliy mahorat maktabi zalida tashkillashtiriladigan O‘tish turnirida 5 ta jamoa qatnashadi. Bular – Farg‘onaning «Neftchi», Toshkentning O‘zSQB, Navoiyning «Qizilqum», Sirdaryoning «Guliston» hamda Qoraqalpog‘iston Respublikasining «Pantera» jamoalaridir.

Qur’aga ko‘ra O‘tish musobaqasini «Neftchi» – O‘zSQB jamoalari o‘yini ochib beradigan bo‘ldi. Har kuni to‘rtta jamoa ikkita juftlikda uchrashuv o‘tkazadi, beshinchi jamoa esa dam oladi. Musobaqa g‘olibi bir davrali tizimda jamg‘arilgan ochkolar soniga ko‘ra aniqlanadi. Ikki yoki undan ko‘proq jamoa yakunda bir xil ochko jamg‘arsa, o‘rinlar o‘zaro o‘yinlar natijasiga ko‘ra aniqlanadi.