Osiyo Futbol Konfederasiyasi (OFK) 2026 yilgi Jahon chempionatiga yo‘llanma beruvchi pley-off bosqichi mezbonlari sifatida Qatar Futbol Assosiasiyasi va Saudiya Arabistoni Futbol Federasiyasi tanlanganini rasman e’lon qildi.
Ushbu markazlashgan formatdagi musobaqada Osiyo qit’asi saralashi 3-bosqichida guruhda 3 va 4-o‘rinlarni egallagan jami 6 ta terma jamoa ishtirok etadi: Indoneziya, Iroq, Ummon, Qatar, Saudiya Arabistoni va Birlashgan Arab Amirliklari.
Jamoalar 2025 yil 8–14 oktyabr kunlari bo‘lib o‘tadigan bahslarda ikki guruhga bo‘linadi. Har bir guruhda uchta jamoa bo‘ladi. Guruh g‘oliblari 2026-yilgi futbol bo‘yicha Jahon chempionatiga to‘g‘ridan-to‘g‘ri yo‘llanmani qo‘lga kiritadi.
Guruhda ikkinchi o‘rinni egallagan jamoalar esa 2025 yil 13 va 18 noyabr kunlari ikki o‘yindan iborat pley-off final bosqichida o‘zaro bellashadi. Ushbu qarama-qarshilik g‘olibi qit’alararo pley-off turnirida ishtirok etish huquqini qo‘lga kiritadi.
Ushbu o‘yinlarga rasmiy qur’a tashlash marosimi 2025 yil 17 iyul kuni bo‘lib o‘tadi.
