O‘zbekiston terma jamoasi va SSKA hujumchisi Abbosbek Fayzullayev YouTube’dagi «Nobel» kanalida «Manchester Siti» himoyachisi Abdukodir Husanov qanday qilib Yevropa skautlari diqqat markaziga tushgani haqida qiziqarli voqeani so‘zlab berdi.

Eslatib o‘tamiz, Husanov 2023 yilda Belarusning «Energetik-BGU» jamoasidan Fransiyaning «Lans» klubiga o‘tgan, 2025 yil boshida esa uni «Manchester Siti» 40 million funt evaziga sotib olgan.

— Men Husanov haqidagi bir hikoyani bilaman: Argentinaga qarshi o‘smirlar o‘rtasidagi o‘yin bo‘lgan. Skautlar o‘sha o‘yinga kelgandi, aslida bir argentinalik himoyachini kuzatish uchun. Ammo ularning e’tiborini aynan Husanov tortdi. Shundan keyin u «Lans»ga yo‘l oldi va Yevropadagi faoliyati boshlandi.

Men o‘sha o‘yinni yaxshi eslayman. Bu 20 yoshgacha bo‘lganlar o‘rtasidagi jahon chempionatidagi bellashuv edi. Bu chempionat ochilish o‘yini bo‘lgan, 30 mingga yaqin tomoshabin bor edi. Biz yaxshi o‘ynadik, garchi 2:1 hisobida yutqazgan bo‘lsak ham. Husanov o‘sha o‘yinda juda yaxshi harakat qildi. U jahon chempionatida o‘zini ko‘rsata oldi va shu orqali o‘ziga yo‘l ochdi.