"Liverpul" xavotirga tusha boshladi. Himoyachi Ibraim Konate klub bilan shartnomasini uzaytirmadi, amaldagi mehnat shartnomasi esa bir yildan so‘ng o‘z nihoyasiga yetadi. Muzokaralar jarayonida oldinga siljish yo‘q va mersisaydliklar mavsumdan keyin uni tekinga yo‘qotmaslik uchun muhim o‘yinchini shu yozdayoq sotib yuborishi mumkin.
Fichajes nashrining yozishicha, Konatening holatini erkin agentlar tomonidan top-futbolchilarning qo‘lga kiritilishiga ko‘nika boshlagan "Real" diqqat bilan kuzatmoqda. Madridliklar Konate bilan bir yildan keyin xuddi shunday ishni amalga oshirishi mumkin. Shu bilan birga, manbaga ishonadigan bo‘lsak, "qaymoqranglilar" shu yozdayoq "Liverpul"ga taklif bilan chiqish imkoniyatini istisno qilmayapti. Barchasi "Liverpul" va 26 yoshli Konate o‘rtasidagi vaziyatning keyingi rivojiga bog‘liq bo‘ladi.
